Beetroot and its benefits

ఏ ఎత్తయిన ప్రదేశానికో, ఏ పర్వత శిఖరానికో వెళ్లినప్పుడు ఒక్కోసారి సరిపడా ఆక్సిజన్‌ అందకపోవచ్చు.  ఆ కాస్త ఆక్సిజన్‌ కొరత ఏర్పడగానే,  ఎవరికైనా  లోలోపల ఏదో భయం మొదలవుతుంది. ఊపిరి ఆగిపోతున్నట్లే అనిపిస్తుంది. పర్వతారోహకుల్లో  ఎక్కువ మంది ఎదుర్కొనే సమస్యే ఇది.  అయితే,  ఆ సమయంలో కాసింత బీట్‌రూట్‌ రసం సేవిస్తే, ఆ పరిస్థితి నుంచి చాలా వరకు  గట్టెక్కవచ్చని అంటున్నారు పరిశోధకులు. వాస్తవానికి  బీట్‌రూట్‌ రసం తనకు తానుగా  ఆక్సిజన్‌ ఏమీ ఇవ్వదు కానీ ఆ తక్కువ ఆక్సిజన్‌తోనే శరీరం సర్దుకుపోయేలా చేస్తుంది. రక్తనాళాల  పనితీరు సహజంగా నైట్రిక్‌ ఆక్సైడ్‌ను ఉత్పన్నం చేసే సామర్థ్యం మీద ఆధారపడి ఉంటుంది. అయితే పర్వత శిఖరాల్లో లేదా బాగా ఎత్తైన ఇతర ప్రదేశాల్లో ఉన్నప్పుడు శరీరంలో నైట్రిక్‌ ఆక్పైడ్‌ ఉత్పన్నం  కావడం ఒక సవాలుగానే ఉంటుంది. ఎందుకంటే నైట్రిక్‌ ఆక్సైడ్‌ ఉత్పన్నం కావాలంటే దానికి  సరిపడా ఆక్సిజన్‌ ఉండాలి. అందుకు  కావలసినంత ఆక్సిజన్‌ దొరకనప్పుడు నైట్రిక్‌ ఆక్సైడ్‌ లోపాల్ని అధిగమించేందుకు మన శరీరం తనదైన దారులు  వెతుక్కుంటుంది.  అయితే, సరిగ్గా అదే సమయంలో బీట్‌రూట్‌ రసం అందుబాటులో ఉంటే ఈ సమస్యలు వాటికవే తొలగిపోతాయి. బీట్‌రూట్‌లో మౌలికంగా చాలా పెద్ద మొత్తం నైట్రేట్‌ నిలువలు ఉంటాయి. నైట్రేట్‌ను నైట్రో ఆక్సైడ్‌గా మార్చుకునే శక్తి కూడా శరీరానికి ఉంటుంది. 

సాధారణంగా ఎత్తైన ప్రదేశాలకు వెళ్లినప్పుడు రక్తనాళాలు సంకోచిస్తాయి. సరిగ్గా అదే సమయంలో పరిశోధకులు రక్తనాళాల పనితీరును ఈ పరిణామాల్ని ఆర్టీరియల్‌ ఎండో థీలియల్‌ ఫంక్షన్‌, ఫ్లో మీడియేటెడ్‌ డైలెటేషన్‌ పరీక్షల ద్వారా అంచనా వేశారు. నార్వీగియిన్‌ సైన్స్‌ అండ్‌  టెక్నాలజీ  యూనివర్సిటీ, మిడ్‌ స్వీడన్‌ యూనివర్సిటీల అధ్యయనాల ప్రకారం  నైట్రేట్‌ అధికంగా ఉండే  బీట్‌రూట్‌ రసాన్ని తీసుకోవడం వల్ల రక్తనాళాల పనితీరు బలహీనపడకుండా, అవి సమర్థవంతంగా పనిచేయడం మొదలవుతుంది.  స్త్రీ పురుషులు ఇరువురికీ,  బీట్‌రూట్‌ రసాన్ని ఇవ్వడం ద్వారా ఆరోహణకు ముందు ఆరోహణ సమయంలో రక్తనాళాల పనితీరులో వచ్చిన మార్పులను వారు గమనించారు. ప్రత్యేకించి ఆ రసాన్ని ఇచ్చాక రక్తనాళాలు వ్యాకోచం చెందడాన్ని ఒత్తిడిని అధిగమించగలగడాన్ని వారు గమనించారు. పలు రకాల మందులూ మాకులతో పనిలేకుండా కేవలం ఒక సాదాసీదా బీట్‌రూట్‌ రసంతో ఇంతటి అద్భుతాలు జరిగిపోవడం మానవజాతికి ప్రకృతి అందించిన గొప్ప వరం.!

ఆరోగ్యానికి బీట్‌రూట్‌ చేసే మేలు అంతా ఇంతా కాదు. కాలేయాన్ని ఆరోగ్యంగా ఉంచేందుకు, ఊబకాయాన్ని తగ్గించేందుకు, మలబద్దకాన్ని నివారించేందుకు ఇలా ఎన్నో రకాలుగా సాయపడుతుంది. రక్తపోటును తగ్గించి గుండెకు రక్షగా ఉంటుంది. అంతేకాదు, గుండె వైఫల్యం చెందిన రోగులు తిరిగి కోలుకోవడానికీ బీట్‌రూట్‌ జ్యూస్‌లోని పోషకాలు ఉపయోగపడతాయని అమెరికాలోని ఇండియానా వర్సిటీ శాస్త్రవేత్తలు తెలిపారు.

• బీట్‌రూట్‌ జ్యూస్‌: దీన్లో యాంటీ కేన్సర్‌, యాంటీ ఆక్సిడెంట్‌ గుణాలుంటాయి. మూత్రం క్షారత్వాన్ని తగ్గిస్తుంది.
• పుచ్చరసం: దీన్లో 92 శాతం నీరు ఉంటుంది. ఈ రసం తాగితే మూత్రపిండాల్లోని రాళ్లు కరిగి విసర్జించబడతాయి.