భారతీయ సంప్రదాయంలో ముఖ్యంగా దక్షిణాదిలో అరిటాకు భోజనం సహజం. అరిటాకు భోజనం మనకు అనాదిగా వస్తున్న ఆచారం. దీన్నొక సంప్రదాయంగా పాటిస్తారు. అరిటాకుపై వేడి వేడి అన్నం, పప్పు, నెయ్యి తదితర వంటకాలు వ డ్డించుకుని భుజిస్తే ఆ రుచి వర్ణనాతీతం. అయితే అరిటాకుపైనే ఎందుకు వడ్డన? అని ప్రశ్నిస్తే అందుకు కారణాలు ఎన్నో. అవేంటో ఒకసారి చూద్దాం!
- పచ్చటి అరిటాకులో వేడి వేడి ఆహారపదార్థాలు వడ్డించడంవల్ల ఆకుపైన ఉండే పొర కరిగి అన్నంలో కలుస్తుంది. దీనివల్ల భోజనానికి మంచిరుచి వస్తుంది.
- ఈ ఆకులో అనేక రకాల పోషకాలు ఉంటాయి. వేడి పదార్థాలు ఆ ఆకుపైన పెట్టుకుని తిన్నప్పుడు ఆకులోని విటమిన్లు అన్నీ మనం తినే ఆహారంలో కలిసి మంచి పోషకాలను అందచేస్తాయి. వేడి వేడి పదార్థాలు అరిటాకులో తినడంవల్ల కఫ, వాతాలు తగ్గి శరీరానికి బలం చేకూరుతుంది, ఆరోగ్యం చక్కబడుతుంది. శరీరం కాంతిమంతమవుతుంది. ఆకలిపుడుతుంది. ఎన్నో రకాల జబ్బులను నిరోధించే శక్తి అరిటాకులో ఉండడం విశేషం.
- రావి, మోదుగలాంటి ఆకులను ఎండబెట్టి విస్తర్లు తయారు చేస్తారు. కానీ భోజనానికి పచ్చి అరిటాకులనే ఉపయోగిస్తారు. అరిటాకుల్లో తినడంవల్ల ఆహారం త్వరగా జీర్ణమవుతుంది.
- నల్లటి కురులను మనసొంతం చేస్తుంది అరిటాకు భోజనం. క్రమంతప్పకుండా ‘అరిటాకుల్లో భోజనం’ చేస్తే బూడిదజుట్టుతో ఉన్నవారు నల్లనిజుట్టు పొందుతారు.
- కేరళలో కొన్ని ఇడ్లీలు, కొన్ని రకాల నానవెజ్‌ వంటలు అరిటాకుల్లోనే వండుతారు. అన్ని విటమిన్లూ అందడంవల్ల శరీరం ఆరోగ్యంగా ఉంటుంది. పైగా ఇది పర్యావరణ హితం కూడా!
- ఆకలితో ఉన్నప్పుడు శత్రువుకైనాసరే అన్నంపెట్టే సంస్కృతి మనది. అలా శత్రువుకి భోజనం పెట్టినప్పుడు అన్నంలో విషం కలిపారన్న భయం ఉంటుంది. అదే అరిటాకులో భోజనం పెట్టినప్పుడు, ఒకవేళ విషాహారం పెడితే, అరిటాకు నల్లగా మారిపోతుంది. అన్నంలో విషం ఉందని బహిర్గతమైపోతుంది.
- అరిటాకుల్లో పాలీఫినాల్స్‌ ఉంటాయి. ఇవి ఎక్కువగా యాంటీ ఆక్సిడెంట్స్‌ను కలిగి ఉంటాయి. వీటిపై వేడివేడి పదార్థాలు వడ్డిస్తే ఇవి కూడా భోజనంలో కలిసిపోతాయి. దీనివల్ల శరీరానికి పోషకాలు అందుతాయి.
- ఏదైనా పదార్థంలో ఉప్పు ఎక్కువైతే, దాన్ని తినలేక బైటపడేయకండి. ఉప్పు ఎక్కువైన పదార్థం ఉన్న ఆ పాత్ర మూత తీసి ఆ స్థానంలో అరిటాకును పళ్లెంలాగా బోర్లించాలి. అలా కొంచెంసేపు పొయ్యిమీదపెట్టి ఆ పదార్థాన్ని వేడిచేయడంవల్ల అందులోని ఉప్పుశాతం తగ్గి రుచిగా తయారవుతుంది.
- అరటి ఆరోగ్య ప్రదాయిని. అరటిమొక్కలోని అన్ని భాగాలను అనేక రకాలుగా ఉపయోగిస్తారు. పువ్వును వంటల్లో ఉపయోగిస్తారు. అరటిపండులోని పొటాషియం శరీర కండరాలను ఆరోగ్యంగా ఉంచుతుంది. శరీరానికి శక్తిని ఇస్తుంది.
No comments:
Post a Comment